⊗
Glosáriu ida ne’e nia objetivu mak atu ajuda ema komprende termu jeral kona ba Tasi Timor, fronteiras marítimas no Nasoens Unidas nia Konvensaun ba Lei Tasi nian. Glosáriu ne’e la’os atu fó lista kompletu kona ba termu relevante sira hotu no esplikasaun sira iha ne’e la’os tékniku ka legal.
| Termu | Esplikasaun |
| Arbitrajen Tratadu Tasi Timor | Ema hatene mos ho naran ‘Arbitrajen Espionajen’. Arbitrajen Tratadu Tasi Timor mak disputa ida ne’ebé lao hela entre Austrália no Timor-Leste. Tribunal ida iha Tribunal Arbitrajen Permanente iha Haia mak tesi. Timor-Leste dehan katak Austrália hafuhu Timor-Leste durante negosiasaun ba Determinadus Ajustes Marítimus iha Tasi Timor. Timor-Leste diskuti katak tratadu ne’e la vale ona. Kazu ne’e diferente husi kazu hadau dokumentu ne’ebé Tribunal Internasional ba Justisa mak tesi. |
| Área Konjunta Dezenvolvimentu Pertrolíferu | Área ida ne’ebé Tratadu Tasi Timor estabelese entre Austrália no Timor-Leste iha 2002. Timor-Leste no Austrália mak jere esplorasaun ba rekursu petróleu sira iha área ida ne’e. |
| Arkipélagu | Illa sira no bee sira ne’ebé besik malu ne’e konsidera hanesan entidade ida, ezemplu Indonézia. |
| Asina (tratadu ida) | Hanesan konkluzaun ba negosiasaun sira, Estadu nia reprezentante bele asina testu husi tratadu ida hodi hatudu sira nia Estadu nia intensaun hodi lao tuir tratadu ne’e. Rekirementu seluk tan ba Estadu maioria mak ratifika, tratadu ida, molok tratadu ne’e sai lei. |
| Autoridade Nasional Petróleu (ANP) | Orgaun ida husi Governu Timor-Leste ne’ebé responsavel hodi jere no regula atividade petróliferu iha tasi besik Timor-Leste no mos iha Área Konjunta Dezenvolvimentu Petróliferu. ANP hatán ba Komisaun Konjunta, ne’ebé kompostu husi reprezentante sira husi Austrália no Timor-Leste. |
| Bee-interna | Bee ne’ebé iha rai laran iha nasaun ida nia liña baze nia laran. Ezemplu, mota ida ka lagoa ida. Estadu ida iha direitu ba nia bee-interna hanesan ho nia direitu ba rai maran. Iha regulamentu espesífiku ba Estadu Arkipélagu, ne’ebé dehan katak bee hotu iha arkipélagu konsidera hanesan bee-interna. |
| Dalan ekidistânsia / sirkumstânsia relevante | Tribunal Internasional ba Justisa hili dalan moderna (no maioria husi orgaun rezolusaun ba disputa ba fronteira marítima) hodi determina fronteiras marítimas ba nasaun sira ne’ebé sira nia Zona Ekonómika Eskluziva tatulak malu. Internasional ba Justisa no Tribunal Internasional ba Lei Tasi mos uza dalan ida ne’e.
Iha faze tolu ba dalan ida ne’e:
|
| Delimitasaun | Dada liña ba fronteira marítima ida. |
| Direitu ba bee-laran | Direitu marítimu ba rekursu sira iha bee-laran (saida mak iha tasi laran) iha área marítimá ida, hanesan direitu ba peska. Direitu ba bee-laran la hanesan ho direitu ba tasi-kidun, ida ne’ebé inklui direitu ba extrasaun ba petróleu no gaz (tanba sira iha tasi-kidun). Ezemplu, iha área balu husi tasi entre nasaun rua, nasaun ida bele iha direitu ba bee-laran no ida seluk bele iha direitu ba tasi-kidun. Ida ne’e signifika katak nasaun ida bele peska iha área ne’e no ida seluk bele hasai petróleu no gaz. |
| Estadu Kosteiru | Termu ida ne’ebé ema uza iha Nasoens Unidas nia Konvensaun ba Lei Tasi hodi deskreve nasaun ida ne’ebé iha tasi-ibun. |
| Fronteira marítima | Estadu kosteiru iha direitu ba defini ka ‘delimita’ sira nia soberania ba teritóriu marítima nia luan tuir lei internasional. UNCLOS rekoñese direitu oin-oin ba área marítima hanesan tasi teritórial (besik liña tasi-ibun), Zona Ekonómika Eskluziva (ne’ebé luan to’o 200 millas naútikas husi liña tasi-ibun), no plataforma kontinental (ne’ebé bele iha Zona Ekonómika Eskluziva nia okos, ka iha sirkumstânsia balu nia bele liu tan husi Zona Ekonómika Eskluziva). Estadu idak-idak sei ezerse direitu soberania husi nia tasi-ibun to’o nia fronteira marítima. |
| Greater Sunrise | Petróleu no gaz ne’ebé boot liu iha Tasi Timor. Greater Sunrise kompostu husi kampu Sunrise no kampu Troubadour. Kampu seluk tan iha Tasi Timor mak inklui Bayu-Undan, Laminaria, Corallina, Buffalo, Kitan, Elang no Kakatua. |
| Hasees-aan (husi jurisdisaun ba fronteira marítima) | Termu ne’e ema uza hodi deskreve Estadu ida hasees-aan husi prosesu obrigatória rezolusaun ba disputa tuir Nasoens Unidas nia Konvensaun ba Lei Tasi nian. Austrália ‘hasees-aan’ husi jurisdisaun ida ne’e tuir konvensaun fulan rua molok Timor-Leste restaura nia independênsia iha 2002. Ida ne’e signifika katak Timor-Leste la bele husu Tribunal Internasional ba Justisa ka Tribunal Internasional ba Lei Tasi nian hodi halo determinasaun obrigatória ida ba fronteira marítima ida entre Austrália no Timor-Leste. |
| Kazu hadau dokumentu | Kazu ne’e entre Austrália no Timor-Leste no kazu ne’e tesi iha Tribunal Internasional ba Justisa. Iha 2013, seguransa ofisial Austrália nian hadau dokumentu balu husi Timor-Leste nia advogadu ida iha Kambera, Austrália. Austrália hateten katak dokumentu hirak ne’e iha informasaun segredu. Timor-Leste protesta Austrália atu la bele hadau dokumentu hirak ne’e. Iha orden provizóriu (la’os orden ikus) jurista maioria husi Tribunal Internasional ba Justisa dehan katak Austrália tenki taka metin tiha dokumentu hirak ne’e (no la bele lee) no Austrália la bele interfere ho Timor-Leste nia kominikasaun ho nia advogadu sira. Ikus mai Timor-Leste hapara tiha kazu ne’e hafoin Austrália fó fila fali dokumentu hirak ne’e. Kazu ne’e la hanesan arbitrajen ba Tratadu Tasi Timor. |
| Komisaun Konjunta | Komisaun konjunta mak orgaun ida Tratadu Tasi Timor kria entre Austrália no Timor-Leste hodi jere Área Konjunta Dezenvolvimentu Petrolíferu no ho kestaun ne’ebé hanesan. Komisaun konjunta iha reprezentante nain rua husi Timor-Leste no reprezentante nain ida husi Austrália. |
| Konkavu (liña tasi-ibun) | Liña iha tasi-ibun ne’ebé kurva tama ba laran. |
| Konsellu Ministru | Konsellu ne’e estabelese hodi jere Área Konjunta Dezenvolvimentu Petróliferu. Nia konsisti husi ministru relevante sira husi Governu Austrália no Timor-Leste nian. |
| Konsiliasaun Obrigatória | Prosesu ida tuir UNCLOS ne’ebé iha painel konsiliador ida fó asisténsia ba Estadu sira hodi hetan solusaun amigável ida ba sira nia disputa. |
| Konvexu | Liña iha tasi-ibun ne’ebé kurva sai ba liur. |
| La afeta ba interese legal | La bele afeta ka uza hodi estraga fali ema ida (ka nasaun ida). |
| Liña baze arkipélagu | Se ita konsidera nasaun ida hanesan Estadu Arkipélagu tuir Nasoens Unidas nia Konvensaun ba Lei Tasi, nasaun ne’e bele uza liña baze reta arkiplélagu husi illa prinsipal sira nia rohan, hodi sukat tasi teritórial nia luan. Jeralmente, liña baze arkipélagu la uza hodi delimita fronteira marítima entre Estadu sira. Indonézia hanesan ezemplu ida husi Estadu Arkipélagu – bee entre illa prinsipal sira iha Indonézia konsidera hanesan bee-interna tuir Nasoens Unidas nia Konvensaun ba Lei Tasi nian. |
| Liña baze normal | Liña bee-badak (ne’e mak, liña laloran kiik) mak liña baze normal. Jeralmente, tasi teritórial ema sukat husi liña ne’e no delimita fronteira marítma babain ema sukat uza pontu baze fíziku husi liña baze normal. |
| Liña baze reta | Bainhira nasaun ida prenxe kritériu ne’ebé fó sai iha Nasoens Unidas nia Konvensaun ba Lei Tasi, ezemplu nasaun nia tasi-ibun kurva tama ba laran loos, nasaun ida bele dada liña baze reta hodi sukat nia tasi teritórial. Ida ne’e la hanesan ho uza liña baze normal husi liña bee-badak hanesan liña baze hodi sukat tasi teritórial. |
| Liña bee-badak | Bainhira laloran baku mai rai maran. Ema uza liña bee-badak hanesan liña baze normal hodi sukat fronteiras marítimas. |
| Liña ekidistânsia (husi fronteira marítima ida) | Liña ida ne’ebé rohan la iha ne’ebé ekidistânsia (katak, iha klaran) entre tasi-ibun rua ne’ebé hateke malu ka rabat malu. Ezemplu, se nasaun rua konkorda ba fronteira marítima ida ne’ebé tuir liña ekidistânsia katak fronteira iha loos nasaun rua nia klaran (nota katak liña ne’e bele kurva ka meik hodi refleta nasaun rua nia liña iha tasi-ibun no atu nune’e liña ne’e ekidistante duni husi tasi-ibun nasaun rua ne’e nian husi pontu hotu tuir liña ne’e). Liña ekidistânsia nia signifika hanesan ho liña mediana ka liña klaran. |
| Liña mediana / liña klaran (husi fronteira marítima ida) | Liña ida ne’ebé rohan la iha ne’ebé ekidistânsia (katak, iha klaran) entre tasi-ibun rua ne’ebé hateke malu ka rabat malu. Ezemplu, se nasaun rua konkorda ba fronteira marítima ida ne’ebé tuir liña ekidistânsia katak fronteira iha loos nasaun rua nia klaran (nota katak liña ne’e bele kurva ka meik hodi refleta nasaun rua nia liña iha tasi-ibun no atu nune’e liña ne’e ekidistante duni husi tasi-ibun nasaun rua ne’e nian husi pontu hotu tuir liña ne’e). Liña mediana / liña klaran nia signifika hanesan ho liña ekidistânsia. |
| Memorandu Intendimentu | Dokumentu ida ne’ebé refleta parte rua nia (ezemplu nasaun rua) intensaun ka hakarak komun. Objetivu prinsipal husi Memorandu Intendimentu mak atu hatudu katak parte rua sei buka hetan akordu ida, ka envolve iha prosesu ida hodi hetan rezultadu ida. Baibain, nesesidade husi Memorandu Intendimentu ne’e la kesi parte rua ne’e legalmente (maibé, klaúzula balu, hanesan konfidensialidade, bele kesi parte rua ne’e). Iha kontestu fronteiras marítimas, nasaun rua bele tama ba Memorandu Intendimentu ida hodi hateten katak sira sei uza sira nia esforsu tomak no halao iha boa fé hodi hahú negosiasaun ba fronteiras marítimas iha tempu balu nia laran. |
| Millas Naútikas | Unidade ne’ebé ema uza hodi sukat tasi. Milla naútika 1 besik atu hanesan ho metru 1,852. Estadu kosteiru nia Zona Ekonómika Eskluziva nia luan bele to’o 200 millas naútikas husi nia liña tasi-ibun. |
| Nasoens Unidas nia Konvensaun ba Lei Tasi nian (UNCLOS) | Akordu internasional prinsipal kona ba lei tasi nian. Nasoens Unidas nia Konvensaun ba Lei Tasi finaliza iha 1982 no vigor tiha ona dezde 1994. Husi tratadu internasional sira hotu, Nasoens Unidas nia Konvensaun ba Lei Tasi mak tratadu ida ne’ebé hetan asina (no ratifika) barak liu iha mundu. |
| Plataforma kontinental | Plataforma kontinental konsisti husi tasi-kidun no rai iha nia okos. Tuir UNCLOS, Estadu kosteiru ida iha direitu ba plataforma kontinental ne’ebé nia luan to’o oitoan liu mak 200 millas naútikas husi Estadu ida nia liña baze. Iha kazu balu (ezemplu bainhira la iha reivindikasaun ne’ebé tatulak malu husi Estadu seluk), Estadu ida bele reivindika plataforma kontinental liu husi 200 millas naútikas bainhira iha ‘prolongasaun natural’ husi plataforma ne’e. Austrália rekoñese tiha ona reivindaksaun ba plataforma kontinental liu husi 200 millas naútikas ba Zona Ekonómika Eskluziva iha parte balu husi nia liña tasi-ibun. |
| Ratifika (tratadu ida) | Tratadu ida la vigor ka kesi Estadu ida legalmente to’o Estadu ne’e ratifika tratadu ne’e. Ratifikasaun mak faze ikus hodi fó Estadu nia konsentimentu formal ba tratadu ida. Hafoin Estadu ida asina tiha tratadu ida, jeralmente Estadu ne’e sei fó nia konsentimentu formal liu husi pasa aktu Parlamentu ida, ka liu husi deklarasaun formal ida husi Governu ida. |
| Tasi Boot | Iha área oseanu iha ne’ebé la iha nasaun ida mak bele reivindika direitu fronteira marítima. Tasi boot ne’e ema hotu nian. |
| Tasi teritórial | Tasi teritórial nia luan to’o 12 millas naútikas husi Estadu ida nia liña baze (ne’ebé babain ema dada husi liña bee-badak iha tasi-ibun). Estadu iha kontrola ba sira nia aero-espasu iha lalehan, iha tasi teritórial nia leten no bee laran, tasi-kidun no rai-okos iha karaik. |
| Tasi-ibun rabat malu | Tasi-ibun rabat malu, ezemplu Timor Osidental (Indonézia) nia tasi-ibun no Timor-Leste nia rai maran. |
| Tasi-kidun | Rai iha tasi-kidun. |
| Timor Gap | Fatin mamuk entre pontu A16 no A17 iha Tasi Timor husi fronteira marítima ne’ebé Austrália-Indonézia kria iha 1972. Área Konjunta Dezenvolvimentu Petróliferu, ne’ebé kria tuir Tratadu Tasi Timor entre Austrália no Timor-Leste, ne’e besik iha fatin ‘mamuk’ ne’e nia laran. |
| Timor Trough | Formasaun jeolojia ne’ebé tasi-kidun husi parte sul Timor-Leste nian sai klean no kloot. |
| Tratadu | Akordu formal ida, kesi Estadu rua ka liu legalmente. Atu haré Tratadu entre Timor-Leste ho Austrália, hanehan iha ne’e. |
| Tribunal Arbitrajen Permanente (PCA) | Orgaun internasional ida hodi rezolve disputa sira. Tribunal Arbitrajen Permanente mak tesi disputa ba fronteira marítima no disputa sira seluk ne’ebé relasiona ho tratadu no investimentu sira. Estadu sira sei ba Tribunal Arbitrajen Permanente bainhira sira la bele rezolve disputa entre sira. Tribunal Arbitrajen Permanente iha Haia iha Olanda. Tribunal ida tuur iha Tribunal Arbitrajen Permanente mak tesi hela Arbitrajen ba Tratadu Tasi Timor entre Austrália no Timor-Leste. |
| Tribunal Internasional ba Justisa | Tribunal prinsipal ba Nasoens Unidas no ema hatene liu hanesan “Tribunal Mundu” nian. Só Estadu sira (nasaun sira) deit mak bele hola parte ba prosesu iha tribunal ne’e. UNCLOS fó jurisdisaun ba Tribunal Internasional ba Justisa hodi tesi disputa ba fronteira marítima entre nasaun sira. Tribunal Internasional ba Justisa iha Haia iha Olanda. |
| Tribunal Internasional ba Lei Tasi (ITLOS) | Tribunal ida ne’ebé ema estabelese hodi rezolve disputa sira ne’ebé relasiona ho Nasoens Unidas nia Konvensaun ba Lei Tasi. Ida ne’e inklui disputa ba fronteira marítima. Tribunal Internasional ba Lei Tasi ne’e iha Hamburg, Alemaña. |
| Zona Ekonómika Eskluziva | Zona Ekonómika Eskluziva nia luan to’o 200 millas naútikas husi Estadu ida nia liña baze. Iha zona ne’e nia laran, Estadu sira iha direitu, atu esplora rekursu moris no maten sira iha tasi-kidun, rai-okos no bee laran, inklui rekursu petróleu no peska. |
Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.
Se iha no bele, Gabinete Fronteiras Marítimas fornese anexu no link sira iha lian Tetun.