⊗
Timor-Leste mak Estadu kosteiru ida iha Sudeste Aziátiku, noroeste husi Austrália no parte lorosa’e husi Indonézia nia arkipélagu nia rohan.

Ba lorosa’e, norte no oeste, ita nia viziñu marítima mak Indonézia, Estadu arkipélagu ida ne’ebé boot liu hotu iha mundu.

Iha sul ita hetan ita nia viziñu boot, Austrália, ne’ebé iha área marítima boot liu iha mundu. Tasi Timor mak fahe Timor-Leste ho Austrália ho nia distânsia besik 250 millas naútikas, husi pontu ne’ebé besik liu no la dook liu husi 400 millas naútikas. Plataforma kontinental iha Tasi Timor ne’e la klean liu husi 200 millas naútikas. Nia luan husi rai maran noroeste Austrália nian to’o tasi klean no klot Timor Trough. Parte husi plataforma ida ne’e ema hanaran Bonaparte Basin, basia sedimentar (tahu iha tasi-kidun) no zona ida prospetiva tebtebes ne’ebé inklui depózitu gaz-kondensadu Sunrise no Troubadour (hamutuk ema hanaran Greater Sunrise).

Istória badak kona ba Timor-Leste nia luta ba fronteiras marítimas

Tasi Timor sai tiha ona asuntu ba interese komersial ba dékadas tanba nia rezerva rekursu petróleu no gáz ne’ebé barak tebes.

Molok restaurasaun ba Timor-Leste nia independênsia iha 2002, bainhira nasaun ne’e sei iha Indonézia nia ukun, Austrália ho Indonézia negosia hodi halo akordu ida iha área Tasi Timor entre Timor-Leste no Austrália, ema hatene ho naran ‘Timor Gap’ hodi fahe reseita husi rekursu sira ne’ebé sira esplora iha área ida sira hanaran ‘Zona Kooperasaun’. Akordu ida ne’e ema hatene ho naran Tratadu Timor Gap, fó benefisiu boot ba Austrália liu husi saida mak la’os nia direitu tuir lei internasional.

Iha Marsu 2002, fulan rua molok Timor-Leste restaura nia independênsia Austrália ‘hasés-aan tiha’ husi disputa fronteira marítima husi jurisdisaun obrigatória ba Tribunal Internasional ba Justisa, Tribunal International ba Lei Tasi nian no orgaun rezolusaun ba disputa sira seluk tuir UNCLOS. Tuir lei internasional, la hanesan ho lei rai laran nian, Estadu sira presiza simu jurisdisaun husi orgaun internasional no konkorda atu tuir desizaun saida deit mak orgaun ne’e halo molok Estadu seluk bele husu orgaun hirak ne’e atu rezolve disputa ida.

Ida ne’e katak Timor-Lete la bele buka tribunal internasional ida hodi fó determinasaun ida ne’ebé bele kesi parte rua kona-ba nia fronteira marítima permanente ho Austrália.

Governu Austrália mos rekuza Timor-Leste nia pedidu atu halo negosiasaun kona-ba fronteira marítima.

Aprende tan kona ba akordu Tasi Timor

Lé tan kona-ba Timor-Leste nia Fronteiras Marítimas iha ne’e

AVIZU LEGAL

AVIZU IMPORTANTE

Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.

Se iha no bele, Gabinete Fronteiras Marítimas fornese anexu no link sira iha lian Tetun.

Arkipélagu

Illa sira no bee sira ne’ebé besik malu ne’e konsidera hanesan entidade ida, ezemplu Indonézia.

Timor Trough

Formasaun jeolojia ne’ebé tasi-kidun husi parte sul Timor-Leste nian sai klean no kloot.

Timor Gap

Fatin mamuk entre pontu A16 no A17 iha Tasi Timor husi fronteira marítima ne’ebé Austrália-Indonézia kria iha 1972. Área Konjunta Dezenvolvimentu Petróliferu, ne’ebé kria tuir Tratadu Tasi Timor entre Austrália no Timor-Leste, ne’e besik iha fatin ‘mamuk’ ne’e nia laran.